( دايني فرح)
كاظم الزهيري
دايني فرح بلكي الحزن أنساه
يالعايش أفراح او دوم متهني
احسبني يتيم اوجاي يوم العيد
ونه ابعازة الفرحة من زغر سني
دفك جيس المحبة ونطي للمعتاز
اجيتك ماد ايدي ابگلب متعني
أروح المن بعد عيناك يابو الشوك
ونته أول الناس بشوگي تفهمني
اغنيلك غنه المجروح تالي الليل
ونته ابفرگتي مرتاح وتغني
دوهني هواك او حيرتني سنين
واكتم مااگل للناس دوهني
خاويت الحزن لجلك اوگلت ايهون
او على مودك اطب للنار متعني
تجويني ابجمرهه وانه اگول أفيش
ونته امصدك ابنارك تجملني
وتسالني اعله حالي ولك يابطران؟
تدري ابحالتي معقولة تسألني!
سكته وياك خلهه او لاتهيج اجروح
اجروحك سكتتهن ليش تلجمني
عاشرت الصبر وتجرع الكاسات
او ركضت اوياك ياما او خيبت ظني
رسيني اعله حاله او گلي شنهي الراي
لو ترجع حبيبي لو تودعني
الرئيسية 
