شوكة الكعب اسبابها وعلاجها
شوكة الكعب اسبابها وعلاجها

الكعب وما أدراكم ما الكعب
عضو مهم ومحترم وفى منتهى الجمال
لكن ساعات بقى بيخلينا نقول آى ويزعلنا منه
مش عارفة إعتراض يعنى علشان إحنا ماشيين عليه
لكن والله مش بإيدينا
وما علينا

ألم الكعب يا ترى ليه؟
هو الجزء بتاع الكعب ده موجود فيه ايه
عظم...صح
مش بس كدة
وكمان أعصاب وأوعية دموية وحاجة تانية مهمة كمان فيه حزمة حلوة كدة مخلوقة من الأنسجة الضامة ودى بتربط بين عظمة الكعب وبين الأصابع
الصور دى بتوضحها





ايه تانى كمان مفاصل وأوتاد العضلات وكمان الجلد ما ننسهوش
أى مشاكل فى الأجزاء اللى بتدخل فى تركيب الكعب والحاجات المحيطة بيه بتخلينا نتأوه وبتحسسنا بألم
يعنى مثلا:

1. الجروح فى الجلد
2. لو حصل ولا قدر الله كسر فى العظم
3.لو حصل إلتهاب لأى حاجة إلتهاب للمفصل أو للوتد او للعصب أو للأوعية الدموية .
4.لو حصل إن حد زعل الأعصاب اللى ماشية وداس عليها
5.أهم حاجة بقى فى الموضوع كله حزمة الأنسجة الضامة اللى إحنا إتكلمنا عليها
يعنى أهم سبب لألم الكعب هو الحزمة دى ...هى المتهم الأول ..وعلشان كدة هى اللى هنحطها فى قفص الإتهام وهنتكلم عليها بالتفصيل.


نتوء الكعب أو شوكة الكعب

نتوء الكعب ده حاجة كدة شبه الشوكة بتطلع فى كعب الرجل وبتعتبر أهم سبب لآلام الكعب
شايفين الصورة دى
والصورة دى



إيه بقى الموضوع ده
إزاى يعنى تطلع لى شوكة فى كعب رجلى
نرجع للحزمة الضامة المحترمة ال plantar fascia الحزمة دى تفضل ماشية تمام
التمام وبتؤدى وظيفتها على أكمل وجه لغاية بقى ما حد يستفزها تقوم تلتهب
وتتشد وكرد فعل طبيعى للجسم إتجاه هذا الإلتهاب
تبتدئ أملاح الكالسيوم تترسب ما بين طبقات الحزمة دى وتعمل لى الشوكة اللى مزعلانا.
فيه ناس كتير بيبقى عندها الشوكة دى وما فيش ألم ومش حاسة بيها وناس تانية بيبقى الألم متوسط او جامد ...كل واحد ونصيبه بقى .

طيب ايه الأسباب اللى بتستفز حزمة الألياف الضامة إللى وظيفتها الأساسية
إنها تحمى بطن الرجل وتحافظ على شكل التقويسة المميزة للرجل البشرية :

1. واحد طول النهار واقف على رجله

2. واحد كان بقاله سنين وسنين بيشتغل شغلة مكتبية ومش واخد على الحركة وفجأة غير شغله بشغل تانى مليان حركة (طرزان مثلا)

3. واحد ولا مؤاخذة يعنى مصمم يلبس حذاء مش مريح على الأرض عدل من غير ما يحطله فرش طرى يريح عليه رجله المسكينة

4. واحد وزنه زاد.

5. واحد قرر إنه يمارس رياضة جرى أو تسلق السلالم ويا سلام بقى لو بيلعب باسكت



أو تنس



6. واحد شهم وعربية صاحبه إتعطلت نزل يزقها.

وغيره وغيره من الأمثلة العديدة اللى بتزود الضغط على الطبقة المسكينة دى وتخليها تلتهب.

المشكلة دى بتكون فوق الثلاثين سنة
نسبتها فى الستات أكتر من الرجالة
ونسبتها فى أصحاب الوزن الزائد أكتر
و 43% من اللى بيعانوا من المشكلة دى بتطلب مهنتهم إنهم يقفوا على رجليهم أكثر من ست ساعات يوميا.

طيب نوصل بقى للألم
تعالوا نوصفه كدة
يعنى علشان نتعرف عليه

*غالبا غالبا _بس مش فى كل الحالات _الألم ده بيظهر مع اول خطوات يخطوها
المريض فى الصباح بعد ما ينزل من سريره بعد ما يقضى وقت ظريف فى النوم
ورجليه تاخد على الراحة

*بيبقى فى الجزء الأمامى من الكعب بس ممكن يظهر فى اى جزء عادى يعنى .

*يتراوح من حيث الشدة

*ممكن يكون متصل وممكن يروح ويجى

طيب فيه هنا سؤال وجيه
ده إلتهاب
إزاى بقى لما أحط إيدى عليه وأضغط ما يوجعنيش
إزاى برضه الجلد من الخارج شكله طبيعى
الإجابة إن الليفة الملتهبة دى مدفوسة جوة مش على السطح يعنى فبالتالى
محتاجة ضغطة محترمة علشان تقول آى وما فيش ضغط اكثر قوة ولا إحترام من ضغط
جسمك كله وإنت واقف وماشى عليها.

نيجى بقى للعلاج
زهقتم ....
معاكم حق
بس خلاص هانت

على فكرة الوصفة دى تنفع لأى حد كعبه بيوجعه منقولة من موقع معمول مخصوص علشان الكعب وإتأكدت منها من بعض المراجع الطبية .
بتنفع مع كله إلا مع الألم بتاع الsciatica وده ألم عصبى بعد كدة بإذن الله نبقى نشرحه

الوصفة

1. الراحة ثم الراحة ثم الرااااااااااحة
خاصة بقى من الرياضة اللى ممكن تكون متسببة زى واحد بيلعب بهلوان وماشى على حبل أو بيطلع على سلم
وعلى فكرة أحسن رياضة ممكن يمارسها اللى بيشتكى من المشكلة دى رياضة العوم
لطيفة لإنها سلسة الحركة

2. الثلج
لما ترجع بيتك بعد يوم حافل تجيب حتتين ثلج وتلفهم فى قماشة وتحطهم على الأرض وتقعد وتدوس عليهم برجلك لمدة 5 دقايق
وممكن الموضوع ده يتكرر ثلاثة مرات فى اليوم

3. علاج طبيعى
ده بقى ما أقدرش أتكلم فيه كلمة وياريت حد من إخواننا دكاترة العلاج الطبيعى يعملوا فينا معروف ويقولولنا إزاى الوصفة يعنى
بنعمل مساج وبنشد عضلات سمانة الرجل وحجات كدة بس بتقلل اللم بنسبة كبيرة جدا

4. إرتداء الأحذية الطبية

5 . مضادات للإتهاب زى الأسبرين

6. فيتامين س وفايتمن ب6

7. تقليل الوزن وتضبيط الحجم والرجيم واللذى منه.

شكرا لحسن الإستماع وطولة البال